Ayuntamiento de Berriozar / Berriozarko Udala

Joan den otsailaren 25ean Berriozarko Udalak Osoko Bilkura ospatu zuen eta bertan herritarren intereseko hainbat erabaki hartu zituen berdintasunaren, ondare publikoaren defentsaren, gizarte zerbitzuen eta mugikortasunaren arloetan.

Gai zerrendatik kanpo eta presazko izaeraz, Udalbatzak onartu zuen Eguesibarko Udalak egindako adierazpen instituzionalari atxikitzea, indarkeria matxistak eragindako emakume baten hilketa eta beste bati egindako zauriak direla eta. Gainera, Udalbatzak minutu bateko isilunea egin zuen, biktimekiko eta haien ingurukoekiko elkartasun eta gaitzespen gisa.

Martxoaren 8ko adierazpen instituzionala

Udalbatzak aho batez onartu zuen martxoaren 8a, Emakumeen Nazioarteko Eguna, dela-eta Adierazpen Instituzionala, “Feminismoari esker… gaur izan gaitezke, egon, esan eta erabaki” lelopean Nafarroako Toki eta Lurralde Erakundeek bultzatutako kanpainaren baitan.

Onespen honekin, Udalak berretsi egiten du diskurtso antifeministen aurrean duen jarrera, mugimendu feministaren lorpenekiko herritarren sentsibilizazioa bultzatzen du eta tokiko politika publikoetan genero-ikuspegia zeharka txertatzea indartzen du.

Ondare publikoaren defentsa

Nafarroako Udal eta Kontzejuen Federazioarekin (NUKF) eta Nafarroako Gobernuarekin koordinatuz, Eliza Katolikoak immatrikulatutako balizko ondasun publikoak aztertzen ari diren tokiko erakundeen sarearekin bat egitea erabaki zuen Udalak.

Berriozarrek bere udal artxiboa ikerketa taldearen esku jarriko du eta titulartasun publikokotzat egiaztatzen diren ondasunak berreskuratzeko estrategia mankomunatua bultzatuko du.

Jantoki komunitarioaren ordenantzaren aldaketa

Osoko Bilkurak hasiera batean onetsi zuen jantoki komunitarioa arautzen duen ordenantzaren aldaketa, errenta txikiagoa duten pertsonei zuzendutako tarifa murriztua sartzeko.

Orain arte, egunean 8,56 euroko kuota bakarra zegoen. Proposatutako aldaketarekin, 4,56 euroko tarifa bat ezarriko da egunean, 12.000 eurotik gorako per capita errenta ez duten eta baldintza ekonomiko jakin batzuk betetzen dituzten pertsonentzat. Neurri horren helburua da ekitate handiagoa bermatzea eta zaurgarritasun-egoerei erantzutea. Erabakia 30 egunez egongo da jendaurrean. Jendaurreko aldian inork erreklamazio, kexa edo oharrik aurkezten ez badu, erabakia behin betikoa bilakatuko da.

Eskualdeko bizikleta elektrikoaren sarea bultzatzea

Udalbatzak mozio bat onartu zuen, bizikleta elektrikoaren sistema publikoa Iruñerri osora hedatzea bultzatzeko, kudeaketa mankomunatu baten bidez.

Udalak konpromisoa hartu zuen etorkizuneko eskualde-sare baten parte izateko, eta Iruñerriko Mankomunitateari eskatu zion merkaturatze-prozesuaren buru izateko eta gehienez ere sei hilabeteko epean proiektu tekniko bat aurkezteko. Era berean, Nafarroako Gobernuaren laguntza eta kofinantzazioa eskatu zuten.

Trafikoarekiko kezka Etxebakar inguruan

Azkenik, osoko bilkuran mozio bat onartu zen, Berriozarren Etxebakarren bizitegi-garapenaren ondorioz trafikoak izan dezakeen hazkundeagatik bere kezka agertuz.

Udalak Nafarroako Gobernuari eta Berriobeitiko Udalari eskatzen die lehenbailehen azter ditzatela segurtasuna eta mugikortasun arina bermatuko dituzten bide soluzioak, etxebizitza berrien okupazioa bukatu baino lehen.